La Xunta Pola Defensa de la Llingua Asturiana (XDLA) destacó esti miércoles que ye fundamental la renovación del Conseyu d’Alministración de RTPA y el cambéu na dirección de la empresa pública, «porque la directiva actual negóse a cumplir cola lexislación vixente en materia llingüístico».
Asina, según la so nota de prensa, destacó una programación onde l’asturianu, según la Xunta, «tuvo so mínimos y acutáu a delles temátiques, ente qu’hubo numberosos espacios que presentaron una imaxe diglósica y non normativizada de la nuesa realidá llingüística. Agora ye’l momentu de que los grupos parlamentarios sumen fuerces pa camudar situación y nomar un xestores comprometíos col audiovisual d’esta tierra, cola cultura propia y col patrimoniu llingüísticu asturianu. Ye de reseñar qu’esti consensu namá puede venir al traviés del apueste por una RTPA onde l’asturianu tenga un usu normal».
Recuerda la Xunta que trés de los seis fuerces parlamentaries (Podemos, IX y Foru) presentáronse a les elecciones defendiendo nel so programa un compromisu mayor de los medios públicos cola cultura y la ‘llingua’. «En total, 17 diputaos. Amás, l’alcuerdu de investidura ente PSOE ya IX recueye n’unu del so puntos la necesidá d’un apueste de RTPA cola emisión de conteníos nel nuesu idioma. Esto ye, en total son 34 los diputaos que sofiten sobre’l papel un cambéu na situación actual que, otra manera, nun ye más que l’aplicación de la lexislación vixente», comenta la Xunta.
La XDLA recuerda que p’aprobar estos cambeos ye necesariu una mayoría cualificada. «Poro, nun queden más sides posibles pa cumplir colo que’l movimientu de reivindicación llingüística lleva defendiendo dende los años ochenta del sieglu pasáu; qu’Asturies precisa unos medios de comunicación públicos independientes y apegaos a la realidá d’esta tierra, onde la llingua propia xuegue un papel fundamental», conclúi la Xunta.